Vaadi Kannaara

வாடி கண்ணாரக் காணலாம் வையம் அளந்தவனை

வணங்கி அமைதி பெறலாம் சிவசங்கரனை

ஓடி ஓடி அலைந்து ஊருக்குழைப்பவனை

தேடிப் பிடித்து அவன் காலைப் பிடித்துவிட

வாடி தவித்தவரை வாழ்த்தி நிலை உயர்த்தி

வாழ்வின் பொருள் கூறி வந்த காரியம் உரைத்து

ஊடித்திரிந்தவரை கூடி மகிழ வைத்து

உற்சாகக் காற்றாக உயரே பறப்பவனை

கோடி மகான் அழைத்த பூலோக கைலாசமிவன்

யோகிராம் சூரத்குமார் கண்ட இறைவனிவன்

காஞ்சி மகான் கணித்த ஸ்ரீ மஹா ஜோதியிவன்

வாஞ்சை நம்மேல் வைத்து வையத்துதித்தவனை

பெற்றவர்க்குப் பெருமை சேர்த்த தனயன் இவன்

மற்ற சொந்தங்களெல்லாம் மறுத்துக் கிளம்பியவன்

கற்றதெல்லாம் முருகன் தந்த வரமென்பவன்

கருணை மிகவே கொண்ட அருணைத் தலைவனை

அஞ்சுதல் தவிர்த்த அரும்பெரும் தலைவனை

அகம் புறம் இரண்டும் ஒரு நிறமானவனை

வஞ்சகம் களைந்திட வலிய எழுபவனை

வானும் மண்ணும் போற்றும் தீனதயாபரனை