Thanukku Thanakku Ennum

தனக்கு தனக்கு என்னும் கழுகு - இல்லை

எனக்கு எனக்கு என்னும் கறையான்

உனக்கு மீதம் இதில் ஏது - இதை

உணர்ந்து கொள்வாயோ மனிதா

மணக்கும் என்று தைலம் பூசி - பிறர்

மதிக்கப் பட்டாடை உடுத்தி

சுவைத்துக் களித்து விருந்துண்டு

உடலைப் பேணுகின்ற மனிதா - உன்னை

கணக்குள் கூட்டிக் கழித்து - ஒரு

காசும் தர்மம் செய்கில்லாய் - வாழ்வுக்

கணக்கு வைத்தானே யமனும் - இதைக்

கணமும் நினைந்தாயோ மனிதா

சொந்தம் சுற்றமெனச் சொல்லி - உனைச்

சூழ்ந்து சுகமடைந்த பேர்கள்

வந்த யமனிடம் உனக்காய் - தான்

வருவேனென்பாரோ மனிதா

உடன் எடுத்து நீ செல்ல

உன்னிடம் என்ன உண்டு

கடன் பட்ட பிள்ளை பெண்டு

கழன்று கொள்வாரே மனிதா

தலங்கள் சென்று வந்தாயோ

தவத்தில் சிறிதும் ஆழ்ந்தாயோ

நலன்கள் ஏதும் விளைத்தாயோ - இறை

நாமம் ஜபித்து வாழ்ந்தாயோ

சத்தியம் பேசி வாழ்ந்தாயோ - விரத

பத்தியங்கள் இருந்தாயோ - இறையைக்

கத்திக் கதறி அழைத்தாயோ - அவன்

கருணை வேண்டி நின்றாயோ

இறை அருள் ஒன்று தானே - உன்னை

இனிய சொர்க்கத்தில் சேர்க்கும்

பறை கொட்டி சிவசங்கர் சொன்னான் - அவன்

பதம் பற்றி உயர்வாயே